सोशल मिडियावर खुसखुशीत मेसेज येतात .कोण कर्ता ,कोणाची रचना हे कळायला मार्ग नाही.पण खरोखर त्या अज्ञात कर्त्यांना सादर नमन !
इकडे घटना घडली न् घडली लगेच समर्पक व अत्यल्प शब्दात प्रतिक्रिया तयार.
कालचेच बघाना ! प्लास्टक बंदी झाली नि मेसेजेस इकडून तिकडे हास्य लकेर फैलावत दरवळू लागले.
स्थान -काळ-वेळ-जनमानसाची पूर्ण जाणीव ठेवणारे हे संदेश खरोखर मार्मिक असतात. कोल्हापुरच्या नावाने गाडीला कॅरीबॅग अडकविण्याचा धमकीवजा संदेश तर पुण्याच्या नावाने प्लास्टिकवर कापडीपिशवी कव्हर शिवून देण्याचा संदेश !
वडसावित्री निमित्त नवरा-बायको नावाच्या एव्हरग्रीन नात्यावर तिरकस संदेश !
दहावी-बारावीच्या वाढीव गुणवत्तेवर स्तुतिपर वा व्यंगात्मक संदेश ; जसे ,आमच्या काळी इतका ताप यायचा ,आता परसेंट मिळवतात. जुने पैसे जसे आज रुपये तसे आमचे जुने मार्क आज भारी समजा !!इत्यादी.
मध्यंतरी भारतीय चलनात पहिल्यांदाच दोनशेची नोट आली . त्यावर खासच मिश्किल विनोद ,की जुन्या जावायांसाठी विशेष व्यवस्था केलीय. शंभर देणे बरे दिसत नाही न् पाचशे देणे बरे वाटत नाही !!
असे अनेक विषयांवरचे विविध संदेश निनावी इकडून तिकडे पाठवले जातात.
थोडेही बरे केले की हातभर श्रेय घेण्याची अहमहमिका असलेल्या या प्रसिद्धिलोलुप जगात स्वतःचे नावही न सांगता लोकरंजन ,प्रबोधन करणारे असे निनावी संदेश वाचले की मनापासून आनंद होतो.
©डॉ. प्रज्ञा देशपांडे.
