#सहजोक्त.

एक लबाड कोल्हा असतो. तो तळ्याच्या काठाने शिकार शोधत फिरत असतो. तळ्यात एक करकोचा असतो. कशी काय माहीत ? पण दोघांची मैत्री होते. करकोचा कोल्ह्याला तलावातील माश्या पकडून देत असतो. रोज रोज चवदार माश्यांचा पाहूणचार खाणारा कोल्हा , एकदा  आपल्या मित्राला अगत्याने घरी बोलावतो.  म्हणतो ,"मित्रा , तुझ्या स्वभावावर भाळलेला मी , तुझा उत्तम पाहूणचार करून जराशी उतराई होऊ इच्छितो. तर कृपया माझ्या घरी ये."   साधा-भोळा करकोचा निमंत्रण स्वीकारून कोल्ह्याकडे जातो.
कोल्ह्याच्या गुहेत. जंगी पार्टी असते. खास पाहूणा अर्थात करकोचा असतो.
जेवणात खीर बनवलेली असते. जेव्हा दोघेही जेवायला बसतात , कोल्हा दोन थाळ्या घेतो न् खीर वाढतो. करकोच्याची चोच लांब असते. त्याला थाळीतून खाणे जमत नाही. इकडे कोल्हा (हे सगळं लक्षात येऊनही) त्याला आग्रह करत असतो. "मित्रा , इतक्या मेहनतीने खास तुझ्यासाठी सारं केले. पण तू नीट जेवतच नाहीस . मी नाराज होईल अशाने !" वगैरे वगैरे.
करकोचा म्हणतो ,"अरे खातोच आहे मी , बघतोय ना तू ".
झालं .करकोचा उपाशीच घरी परततो.
#बालवाङ्मयातील ही कथा ,आजही बोधप्रद आहे.
• समाजात विविध लोकं र‍हतात. मदत केल्याचे दाखवून स्वतःचेच हित साधतात.
•  मैत्री आहे ,असे भासवून शत्रुवत् वागतात.
• शब्दाला जागण्याचा दिखावा करतात न्  शब्द फिरवतात.
• विश्वासु म्हणवतात न् नेहमी विश्वासघात करतात.
 •स्वतः मूळे व्यवस्थेत प्रचंड गोंधळ उडवून द्यायचा न् मीच कसा सांभाळतो हेच सांगत सुटायचे .

ही तर मोठमोठी उदाहरणं झालीत. दैनंदिन जीवनातही छोट्या छोट्या गोष्टींतून लबाडीचा गुणधर्म लपता लपत नाही काही जणांचा.


जसं
•फोन करीन म्हणायचं न् फोनच नाही करायचा.
•नक्कीच येतो सांगायचं न् यायचेच नाही.
•फोन ब्लॉक करायचा न् नेटवर्क इश्यू सांगायचे.
•भरपेट खाऊन यायचे न् खुशाल उपास आहे म्हणायचे.
• एखादा पदार्थ आवडतो  म्हटलं की नेमकं त्याची अॅलर्जी आहे म्हणायचे.
• आपण रीतसर निमंत्रण दिल्यावरही  , मिळाले नाही /अोहो उशीरा पाहिले / घरातील लहानग्यांनी फोन बिघडवला/ नेटवर्क इश्यू आहे अशा सबबी द्यायच्या.
• काँन्टॅक्ट लेन्स लावायचे न् डोळ्याला चष्मा नाही सांगायचे.
• चिल्लर पैसे नाहीत , झाली की परत करतो ,असे नेहमीच सांगायचे.
 इत्यादी इत्यादी

तुमच्या अवती भवती असे लबाड-कोल्हे (इथे स्त्री व पुरुष असा भेद नाही) असतील तर आठवा न् तुम्हाला नेमकं काय सबबी सांगितल्या वा कशा टोप्या घातल्या ते आठवून मेसेज बॉक्समध्ये कळवा .😊
©डॉ. प्रज्ञा देशपांडे.