#सहजोक्त.

.
आमच्या हडस शाळेचे माजी विद्यार्थी म्हणजे खासच रसायन असतात. ते ज्या ज्या क्षेत्रात जातात , तेथे  विशेष स्थान प्राप्त करतात. शिवाय कितीही ज्येष्ठ-श्रेष्ठ झाले तरी शाळेशी जुळूनच असतात. हे शाळेचे भाग्य न् विद्यार्थ्यांच्या संस्कारी व्यक्तिमत्वाचे दर्शन होय. शाळेला आता ७८ वर्षे झालीत पण माजी विद्यार्थ्यांच्या मनातील तिचे मानाचे हार्द स्थान तसेच आहे.
हडसचे विद्यार्थी सर्वोत्तम कार्य करत त्या त्या क्षेत्राला मोठे करत आहेत. आज भारतातच नव्हे तर संपूर्ण विश्वात आमच्या शाळेची ही नररत्ने विखरून चमकत असतात. असे एकही क्षेत्र नाही ज्यात आमचे विद्यार्थी नाहीत !

देशाविषयी कृतज्ञता , अभिमान दर्शवण्यासाठी काही दिनविशेष असतात . त्यापैकी एक म्हणजे कारगील-विजय-दिन. कारगील हे सर्वोच्च उंचीवरील युद्ध-क्षेत्र आहे. 
या निमित्ताने आठवले की , "भारतात लडाख प्रदेशात सर्वोच्च उंचीवरील धावपट्टी आहे. या धावपट्टीला  पुनरुज्जीवित करून  लढावू विमान उतरवण्याचे विक्रमी कार्य केलेले महान देशभक्त व शूर सैनिक आमच्याच शाळेचे माजी विद्यार्थी  एअर व्हाईस मार्शल (सेवानिवृत्त) सूर्यकान्त चाफेकर हे आहेत.
"प्रतिपक्ष" नावाचे मराठीतील गाजलेले न् लाखांच्यावर प्रेक्षक लाभलेले युट्य़ूब चॅनेल आहे. त्यात श्री. चाफेकरांची मुलाखत दोन भागांतून प्रकाशित झाली आहे. त्यांच्या या अतुलनीय पराक्रमाची दखल तत्कालीन राष्ट्रीय व अांतर्राष्ट्रीय  माध्यमांनी घेतली होतीच . पण इतके वर्षांनंतरही त्यांच्या पराक्रमाची उपयुक्तता व महत्व  तसुभरही कमी झालेले नाही.
ती मुलाखत बघतांना  श्री. चाफेकरांचे व्यक्तिमत्व प्रकट होते.  देशप्रेम , आत्मविश्वास , हटके विचार करण्याची वृत्ती , मराठीवरील प्रभूत्व , विनम्रता न् मुख्य म्हणजे निगर्वीपणा आदी गुण , त्यांच्या विषयीचा  आदर  वाढविणारे ठरतात.
श्री . चाफेकर यांच्या बद्दल आवर्जून  सांगण्यासारखं म्हणजे मला मराठी शिकविणा-या आवडत्या चाफेकर बाईंचे ते सुपुत्र होत.  ' चाफेकर बाई म्हणजे मराठीच्या सर्वोत्तम शिक्षिका'  , हे माझेच नाही तर लोकांच्या शाळेत शिकलेल्या सर्वच विद्यार्थीनींचे निश्चित मत  आहे.
भारतीय वायुदालातील सांस्कृतिक व भाषिक दृष्ट्या संमिश्र वातावरणात  अनेक वर्षे र‍ाहूनही श्री. सूर्यकांत चाफेकरांची मराठी भाषा आजही उत्तम असण्याचे कारण म्हणजे चाफेकर बाईच ! श्री. चाफेकरांची मराठी ही   शब्दशः व व्यावहारिक अर्थानेही मातृभाषा आहे , हा विलक्षण योगच आहे.
आपण सुखाने जगत आहोत , त्यासाठी कितेक ज्ञात-अज्ञात  शास्त्रज्ञ , शेतकरी , सैनिक , समाजसेवक  आदी अखंड राबत असतात , याची जाणीव ठेवून वागण्यासाठी असे दिनविशेष  साजरे करणे गरजेचे आहे. 
या छोटेखानी माहितीवाजा लेखनासह कार्यक्रमाची लिंक पाठवत आहे. सर्वांनी नक्कीच बघावी . 
https://youtu.be/2FXbKhny8ag

तुमच्या प्रतिक्रियांच्या अपेक्षेत...
©डॉ. प्रज्ञा देशपांडे.